БАТКЕНДЕГИ НООРУЗ

Облус борбору Баткен шаарындагы Нооруз майрамына арналган майрамдык маданий иш чаралар көргөзмө жарманке менен башталды.

Жергиликтүү жетекчилер кол өнөрчүлүк жана улуттук тамак аш көргөзмөсүн көрүп чыгышты.

Андан соң майрамдын урматына даярдалган сүмөлөктөн ооз тийип, элибизге аманчылык,жергебизге тынчылык тилеген апалар бата беришти.

Майрамдын салтанаттуу бөлүгүндө КРнын Президентинин Баткен облусундагы ыйгарым укуктуу өкүлү Айбек Шаменов баштаган жергиликтүү жетекчилер жалпы журтту куттукташты.

Облус башчысы өз сөзүндө "Нооруз элибизге бейпил жашоону, мол түшүмдү жана чоң ийгиликтерди алып келүүсүнө тилектештигин билдирип, алдыда Баткендин баатыр, эркттүү жана эмгекчил эли менен тилек максаттарга, ийгиликтерге чогуу жетебиз" деген ишеничин билдирди.

Баткен элин Өзбекстандын Сох районунан келген коноктор да жаз майрамы менен куттуктап, эки элге ынтымак каалашты.

Бул күнү аймактын элине маданият кызматкерлери тарабынан концерттик программалар тартууланууда.

Спорт сүйүүчүлөрү үчүн спорттун беш түрү боюнча мелдештер өтүүдө.

КРнын Президентинин Баткен облусундагы ыйгарым укуктуу өкүлүнүн басма сөз кызматы