Баткенде шайлоого карата штабдык жыйын өткөрүлдү

Баткен облусунда 30-ноябрда өтө турган Жогорку Кеңештин депутаттарын шайлоого карата штабдык жыйын болуп өттү. Иш-чарага Кыргыз Республикасынын Президентинин Баткен облусундагы ыйгарым укуктуу өкүлү Айбек Шаменов, шайлоону өткөрүү боюнча облустук штабтын толук курамы катышты.

Жыйында шайлоону жогорку уюшкандыкта өткөрүү, шайлоо участокторунда кемчиликтерге жол бербөө жана бардык уюштуруу иштерине өзгөчө көңүл буруу маселелери каралды.

Ыйгарым укуктуу өкүл Айбек Шаменов белгилегендей, буга чейин облус аймагында үч ирет шайлоо тесттик режимде өткөрүлүп, анда айрым техникалык мүчүлүштүктөр — электр энергиясынын үзгүлтүккө учурашы жана “Түндүк” тиркемеси аркылуу паспорт маалыматтарын кабыл алууда көйгөйлөр байкалган.

Бул кемчиликтерди кайталоого жол бербөө максатында тиешелүү мекемелерге 30-ноябрга чейин бардык даярдык иштерин толук көзөмөлгө алып, маселелерди жоюу тапшырмасы берилди.

Ошондой эле ыйгарым укуктуу өкүл шайлоону таза, ачык жана мыйзамдын чегинде өткөрүү ар бир жетекчинин жарандык милдети экенин белгилеп, алдыдагы маанилүү саясий иш-чараны жогорку деңгээлде уюштуруу боюнча бир катар тапшырмаларды берди.

КР Президентинин Баткен облусундагы ыйгарым укуктуу өкүлүнүн басма сөз кызматы