Баткен районунун чек арага жакын аймактарындагы жарандарды көчүрүү иштери толугу менен аяктады

Баткен районунун Достук жана Дөбө айылдарынын, Ак-Татыр айыл аймагынын Таш-Тумшук айылынын, Көк-Терек жана Мазеиттин жери участкаларынын, ошондой эле Самаркандек айыл аймагынын Тескей участкасынын тургундарын Баткен районунун Бужум айылына караштуу Чет-Булак участкасына курулган жаңы конуштагы 181 турак жайга көчүрүү иш-чаралары толук жыйынтыкталды.

Бул көчүрүү иштери Кыргыз Республикасы менен Тажикстан Республикасынын мамлекеттик чек арасын демаркациялоо боюнча Өкмөттөр аралык жумушчу тобу тарабынан коюлган протоколдук тапшырмалардын негизинде жүргүзүлдү. Демаркациялоо ишинин алкагында тиешелүү инвентаризациялоо процесстери аяктап, учурда жогорудагы аймактарды өткөрүп берүү жана Тажикстан Республикасынын Исфара, Б. Гафуров жана Дж. Расулов райондорунун айрым аймактарын өткөрүп алуу иштери улантылып жатат.

Кыргыз Республикасы менен Тажикстан Республикасынын Өкмөттөр аралык биргелешкен демаркациялык комиссиясынын кыргыз-тажик жумушчу топторунун протоколдук тапшырмасынын негизинде:

• Баткен районунун Кара-Бак айыл аймагынын Достук жана Дөбө айылдарынын, Ак-Татыр айыл аймагынын Таш-Тумшук айылынын, Көк-Терек жана Мазеиттин жери участкаларынын, Самаркандек айыл аймагынын Тескей участкасындагы жалпы 181 турак жай, 133 бош жер тилкеси, 8 социалдык объект жана башка имараттар Тажикстан Республикасына өткөрүлүп берилди;

• Ал эми Тажикстан Республикасынын Исфара районунун Чорку жамаатына караштуу Сомониён, Кожо-Аьло айылдары жана Орто-Боз участогунан жалпы 198 турак үй, 84 бош жер тилкеси, 12 социалдык объект Кыргыз Республикасына өткөрүлүп алынып, тиешелүү ички иштер органдарынын жана чек ара кызматкерлеринин кайтаруусуна тапшырылды.

Баткен районунун Достук айылынын жамааты жума намаз окуп, ата-бабалардын элесине куран окулуп, бата кылынды. Андан соң жергиликтүү тургундар менен жолугушуу өткөрүлүп, көчүрүү иштери жана жаңы конуштагы жашоо шарттары боюнча маалымат берилди.

Достук айылында Баткен жана Согди облустарынын башчыларынын, облустук мекеме ишканалардын жетекчилеринин, ошондой эле кыймылсыз мүлктү инвентаризациялоо боюнча комиссиялардын биргелешкен жолугушуусу өттү. Жолугушууда эки облус башчылары чек ара тилкесиндеги иштердин жүрүшү тууралуу маалымат берип, жыйынтыгында Баткен жана Исфара райондорунун тиешелүү комиссиялары инвентаризациялык акттарды өз ара алмашышты.

Ал эми Лейлек районунун Кулунду айыл аймагынын Раззаков айылынын И. Нурматов жана А. Жаныбаев көчөлөрүнүн, Сада участкасынын жана Максат айылынын тургундарын көчүрүү иштери 2025-жылдын 30-ноябрына чейин толук аяктоо пландалууда.

КР Президентинин Баткен облусундагы ыйгарым укуктуу өкүлүнүн басма сөз кызматы